flavors.me

بسم الله الرحمن الرحيم كيف حالكم جميعا..؟ اليوم بعرفكم على خدمة جدا جميله يمكن بعضكم يعرفها والبعض جديده عليه لاكن أنا أحب أشارككم بأي شي جديد علي الخدمه هي flavors.me  تقدر من خلالها تصمم لك ملف شخصي يحوي على معلومات عنك وصفحاتك في المواقع الاجتماعيه وموقعك الشخصي الخدمة ماهي جديده وكثرة المواقع اللي تقدم هالخدمه لاكن اللي يميزها هنا أنك تقدر تضيف تحديثاتك على تويتر والفيس بوك واليوتيوب وغيرها فا اللي يزور ملفك راح يعرف جديدك في هالمواقع جدا جميل الموقع ويحمل خيارات كثيره بعضها مجاني وبعضها بفلوس واجهة الموقع أول ماتدخل الموقع أضغط على Get started لانشاء صفحه خاصه فيك  عبي هذي 1-ايميلك 2-أسمك(الأسم يظهر في الرابط) 3-كلمة المرور  تم انشاء صفحتك =) الشريط الرمادي اللي على جنب هذا للخيارت ولتعيديل الملف والاضافه عليه  أول خيار تعديل التعريف والأسم أكتب أسمك وتعريف مختصر عن نفسك  الخيار الثاني لاضافة صفحاتك للأسف عندك 5 مواقع بس واذا حاب تضيف زياده لازم تدفع فلوس  هذي خيارات لشكل الصفحه: 1-تخطيط الصفحه فيه منها مجاني وفيه مدفوع 2-خلفية الملف الشخصي 3-الألوان للعنوان والوصف وكل شي 4-الخطوط 5-مومهمه بس هي مكان الحقوق او شي تقدر ترفعه وتنزله يعني تغير مكانه 1-لاضافة تحديثاتك في اي موقع مثلا الفيس بوك 2-تقدر تغير الماوس وتحط ماوس خاص بصفحتك 3-هذا الخيار اظن يوريك الخدمات المفوعه(والله في خدمات حلوه) هذي صفحتي ^^ ان شالله الخدمة أعجبتكم والشرح يكون وافي لكل اللي مرو من هون أمسكو

يقلون تخرجت..!

السلام عليكم ورحمة الله وبركاته كيف حالكم جميعا..؟ أمس أستلمت وثيقة التخرج من الكلية وأخيرا تخرجت شهادتي هي جامعية متوسطة من كلية التقنية قسم محاسبة  درجاتي الحمدلله لابأس بها ومعدلي 3.77 الحمدلله راضيه عنه بما اني تجيني أيام أسحب وما أذاكر زي الناس وكذا المهم أني مستانسة اني تخرجت بس شايله هم الفراغ اللي بعاني منه الحين هذي شهادي الجميلة وعقبال شهادة الجامعة الصدق  لو سمحتو قولو ماشالله تراني مستانسه على المعدل الجميل اللي مثلي خخخخ  طبعا أستقبل تهانيكم وهداياكم في أي وقت حياكم   وع فكرة التاب اللي جابتة لي أمي هذا كان هدية تخرجي منها ياحوبي لها لكم

عام جديد وأماني جديدة

السلام عليكم ورحمة الله وبركاته 

كل عام وانتم الى ربكم أقرب 

وكل عام ومدونتي في تقدم أكبر 

قبل يومين بدت السنه الجديده الله يجعلها سنه خير على الجميع هو المفروض التودينه هذي كانت لما بدت السنه الهجريه بس هذاك الوقت ماكنت فاضيه او ماجا على باللي مدري ايش السالفه بالضبط

المهم أحس ناس كثير متفائلين في السنه الجديده ومتحمسين لها كثير 

أنا من ضمن هالناسات بس في نفس الوقت خايفة اني مااحقق فيها اي تقدم على هالحماس عندي أهداف تعليميه واجتماعيه ودينيه 

أنا أول مره أكتب خطط او أهداف لسنه كاملة دائما خططي تكون قصيرة أجل يعني شهر ثلاث شهور على حسب 

من الخطط اللي كتبتها خلال السنه اللي فاتت وبعضها نفذتها وبعضها لا لكن احس اني راضيه عن نفسي بما اني حققت اللي كنت أتمناه بشده

1- تعلم اللغة الكوريه والانجليزية

زي ماانتم عارفين سجلت في دورة للغة الكوريه والحين ماشيه فيها تمام الحمدلله ولو انه صارت لي عوائق كثيره كنت بترك الدورة بسببها لكن صبرت وتحملت كل مااتذكر حلمي اللي أكبر من تعلم اللغة أتقوى أكثر 

بالنسبة للغة الانجليزيه اللغة الوحيده اللي مااحبها اللغة اللي تعبتني من جد درس دوره في معهد مستويين ووقفت يعني مااحس اني استفدت مره او مخي مقفل على هاللغة ماادري ايش السالفه لكن بماانها لغة مهمه ولازم اتعلمها قررت اتعلمها بطريقة ثانيه راح اذكرها مع الخطط للعام الجديد

2- افتتاح موقع اسلامي كامل

تحمست له كثير كنت ابي أفتح موقع فيه اقسام فقه وحديث وتفسير وتوحيد وثقافه اسلاميه عامه للمسلمين الجدد اللي يجهلون الاحكام ويكون باللغة الانجليزيه في البداية ومع الوقت راح أضيف الكوريه وبعض اللغات الأسيويه 

بس من أكبر العوائق اللي ماخلتني أقدم على هالخطوه ان ماعندي الخبره الكافيه في ادارة المواقع وكذا ولا لقيت أحد يساعدني او انا مابحثت أصلا

3- المشاركة في أعمال تطوعيه

الحمدلله هذي السنه رحنا أنا ومجموعة بنات متطوعات لدار الأيتام مرتين وسوينا لهم حفله بمناسبة العيد 

وان شالله عندنا خطط قادمة غير عن دار الأيتام مثل زيارة مرضى السرطان ودار المسنين 

بس الله يعينا لعمل الخير

4- أحضر أحد دورات تطوير الذات 

حضرت دورة وحده كانت رائعه للأستاذ خالد المنيف بعنوان رحلة التغيير 

5- أقراء كنت كثير 

أنا مااعشق القراءة لاكن هذي السنه أول سنه أقراء فيها بشكل جدي 

تقريبا هذي أهم الأهداف او مااقول الاهداف لان بعضها جا بالصدفه بدون تخطيط مسبق 

                                                                     قائمتي لعام 2011

1- أكمل دراستي وان شالله ربي يعيني لاني متكيسله في الوقت الحالي 

2- راح أدرس انجليزي لكن هالمره راح أجيب معلمه في البيت تعلمني أتوقع هذي افضل طريقة عشان اتعلم اللغة كويس

3- ان شالله ربي يكتبلي سفرة لكوريا قولو أمين

4- ان شالله بنهاية السنه تكون لغتي الكوريه ممتازة

5- راح أحسن علاقتي مع ربي وأتزود من أعمال الخير

6- علاقتي مع الناس أعترف انها مو جيده وحاولت أحسنها لكن مدري ليش أنا كذا بعيده عن الناس اللي حولي حتى صديقاتي نسيتهم راح أحاول احسن علاقاتي والله يعيني 

7- ان شالله أكون فرد مفيد للمجتمع بالأعمال التطوعيه أو بالنصيحه 

8- راح أغير المجتمع اللي حولي باذن الله للافضل 

ماراح أتمنى أشياء زياده عشان مااكون طماعه ولا يتحقق لي ولا شي منهم 

راح أقولكم على شي تونا أنا وأسرتي الكريمه بدينا نسويه الأسبوع هذا أتوقع انه من أهداف أبوي لسنه الجديده لانه يقول لازم نصير أسرة ايجابيه الصراحه حبيت أقتراحه خصوصا ان الواحد يتذكر الأمور الدنيويه وينسى الأخره 

أبوي أقترح علينا أن في يوم واحد من الأسبوع بعد صلاة العصر يعطينا درس خفيف في السيره أو الفقه او اي شي مفيد 

كان الدرس الأول في الفقه ولا تحسبونه درس درس لا يعني سواليف ومناقشات وأسأله 

أخواني الصغار هم اللي يستفيدون أكثر بما أنهم توهم بدو يصلون وكذا 

شكرا لأبوي وان شالله تستمر هالدروس لوقت أطول وأتمنى أن كل أسرة تعمل مثل ماعملنا أنت أو أنتي أقترحي على الأسرة الكريمه وراح تاخذون أجرهم ان شالله وممكن يوم مايكون فيه درس مثلا حفظ كم أيه من اي سورة 

والله شي حلو انا في البداية قلت يالله ايش عنده ابوي مااحنا فاضين ماافتكينا من الدراسه تجينا دراسه في بيتنا بعد بس لما سوينها كان الوضع عادي أنا أقراء من كتاب وابوي يتكلم بطريقة مبسطه عاميه عشان الصغار يفهمون وضحك والوضح كان حلو وبالعكس راح تتحسن العلاقات بين الأسرة وكذا  

تكلمت كثير صح ؟

الله يحقق لنا كل أحلامنا وأمنياتنا الصغيره والكبيره الجديده والقديمه الظاهره والباطنه

تحديث:
بمناسبة السنه الجديده فتحنا باب الحش أقصد عندكم كلام بتقلونه لي رايكم فيني نصيحه اي شي تفضلو هون وخذو راحتكم لاني ماراح اعرف من أنت((ترا روحي الرياضية عاليه  

لكل اللي مرو من هنا