معرض الكتاب

السلام عليكم ورحمة الله وبركاته 

كيف حالكم جميعا..؟

وأخيرا اليوم المنتظر قريب وبكرة راح يكون حفل الافتتاح لمعرض الكتاب لعام 2011

متحمسه مره هالسنه ان شالله أطلع بنتيجه مع هالحماس  

خصوصا اني السنه اللي فاتت ماشريت شي احس اني كنت مفهيه مدري ايش فيني بس أخذت كتاب واحد  

بعد تدوينه خيتو مشاعل بديت أدور على الكتب وأكتب القائمة الخاصة بمعرض الكتاب (مره أفادتني تدوينها الله يجزاها خير  )

بعد موقع goodreads جدا ممتاز اذا تبي تعرف رائي الناس وتقييمهم لكتاب معين مع شرح بسيط لمحتوى الكتاب ودار النشر

وهذا موقع المعرض اللألكتروني لمزيد من التفاصيل

هذي المره ناوية أشتري كتب متنوعه وفي مجالات ماقد قريت عنها

قائمتي المبدئية ولسا ناوية على المزيد خصوصا اني فاضيه هذي السنه

كتب ممكن أشتريها وممكن لا

السعوديه سيرة دولة ومجتمع

ولدت هناك ولدت هنا 

المناعة الفكرية

أين كانوا يكتبون

وفيه في بالي كتب تعليميه بس ماادري ايش بالضبط 

بس أفكر أتعلم أشياء يدويه مثل الخياطه او الأشغال اليدوية البسيطه او الخط العربي حاجة زي كذا 

من السنه اللي فاتت وانا أبحث عن اي كتاب فيه كلمة كوريا والى الآن مالقيت أتمنى ألقى هذي السنه اي شي عن الثقافه او المجتمع او التاريخ

وللمرة الاولى اقرر أشتري روايه أسمها اليهودي الحالي 

أعجبتني قصتها مبدئيا بس اللي قرائها ياليت يقولي اذا تستحق الاقتناء والا عاديه..؟!

حطيت تصويت في المدونة وأتوقع أغلبكم صوت 

الأصوات الأعلى على أتمنى بس ماأقدر أتوقع لأنكم من خارج الرياض أو من دول ثانيه 

بعدين طبعا ان شالله أشوفكم في المعرض 

بعدين ممكن ومايهمني طيب سؤالي ليش ممكن..؟ليش مو أكيد..؟  

ومايهمك حاله ثانيه بس ممكن فعلا ماتهمهم القراءة وهذي يبيلها تدوينه لحالها

عموما اللي مايقدرون خيرها في غيرها وياليت تجون الرياض عشان المعرض والله يستاهل المشوار

كل واحد الحين يقولي ايش جهز لمعرض الكتاب هذي السنه..؟((أقصد قائمة الكتب 

واذا فيه كتاب في قائمتي مايستاهل الاقتناء عطوني رايكم فيه..!

لكم  

طيب أنا عاجبني..!

السلام عليكم ورحمة الله وبركاته 

لاتدققون في العنوان بس من النرفزه جا كذا مدري من وين 

المهم شايفي شعار المدونة(أنا أفعل كل ماأريد لذا فأنا في غاية الوحدة في اللحظة التي أقوم بها بما أحب)

هذي العبارة توصف وضعي الدائم  

انا مدري ليش فيه في مجتمعنا هالناسات كثير اللي يقلون نوره انتي ليش تحبين هالكواريه المفاعيص والا انتي كيف تاكلين هوت دوق 

طيب هالمفاعيص ماحبيتهم الا عشانهم مفاعيص..!والهوت دوق لساني يحبه يعني أقطه مثلا..؟

طيب أنت ماتحب هالأكله او هاللبس مو لازم أنا بعد مااحبه  

شي ثاني ينرفز أكثر من كذا لما يصير اللي قدامك يحب شي بجنون وانت تكرهه بجنون يجلس يقنعك ساعه الا غص تحبينه..! 

طيب مايعجبني كيفي ان شالله أموت((وش دخل  

اللي أعظم من كذا هذولي الناس لو تجي تقنعهم في شي حتى لو صح عليك مايسمعون أصلا ومعتبرين أنفسهم هم الصح وانت الغلطان

ليش من حضرت جنابك..؟

عبارات دائما أسمعها حتى جاني تبلد من كثر ماأسمعها صرت عادي ماكني أسمع 

نوره ليش تحبين الكوريين..؟((عشان عيونهم ممططه

وشوله تتعلمين كوري ماله فايده..!((كذا لقافه

ليش شعرك قصير طويله انتي بنت..؟((والله أنا أشوف شكلي أحلى وهو قصير

ليش ماتلبسين ملابس رسميه..؟((خلقه ماأحب الرسميات 

ليش ماتشقرين حواجبك..؟((حواجبي أحلى من حواجبك  

ليش ماتغيرين جوالك..؟((عندي جالكسي تاب يكفيني بعدين أفكر  

ليش ماترقصين خليجي..؟((والله أحسه رقص فاشل وماأعرف له..

بالله وش عاجبك في هالممثل القبيح..؟((بس عشانك ماتحبينه عجبني خخخخخ 

والقائمة تطول

أبي أعرف الحين مافيه حرية شخصيه في المجتمع والا وش السالفه..؟

يعني لما أمي وأبوي ماقالو شي لازم هم يتدخلون والا يخلون أمي تقولي نوره طولي شعرك مافيه مشغل  

يعني لو اني مسويه حركه غلط والا لبس غلط معليش نتقبل النصيحه لكن حتى ذوقي بتتدخلون فيه  

ومتأكدة لو أني دارسة في قسم غير المحاسبة بيقلون وش فايدته  

يمكن بس هم المفيدين في الحياة..!

حبيت أفضفض لكم شوي بما أني أعاني من هالمشكلة من فترة

فاسلكو الكلام مو مرتب

والشعار حق المدونة في الحقيقة قاله ممثل كوري وأنا لطشتها منه  

تحديث: ليش ماعندك بلاك بيري زينا((مو من مستواي هالتقنية الغبيه

لكل اللي قروا فضفضتي خذو (f)

ينبع البحر =)

السلام عليكم ورحمة الله وبركاته بعد رحلتنا للمدينه المنوره مشينا على ينبع اللي قد زرتها من سنتين تقريبا   بين المدينة وينبع ساعتين بس تقريبا ينبع مقسمه لثلاث أقسام ينبع البحر-ينبع الصناعية-يبنع النخل     ينبع أنا سميتها الجميلة المظلومه مدينه بحق رااااائعه لاكن لم تستغل للأسف شواطئها أفضل بكثير من شواطئ المنطقه الشرقية بحرها أزرق صافي لاكن تفتقر للكثير مثل المنتزهات والفنادق الفخمه والأسواق والمطاعم لو يستغلونها استغلال جيد ويضبطون الشواطئ ممكن تصير أحلى من الخبر والدمام((وجهة نظر   شي ثاني النظافه شبه معدومه في داخل الدريه لكن عند البحر ماأقول انها معدومه لاكن يبيلها شوي لكن البحر نظيييف ماعنده ولا قرطاسه     أول شي بتكلم عن السكن المره اللي قبل سكنا في منتجع الأحمد مرتب وحلو ونظيف ودخلنا منتجع أراك بس كان فيه مشكله بالكهربا ذاك اليوم ولا سكنا فيه بس كان جدا رائع هالمره مالقينا لا هنا ولا هناك فا سكنا في فله صغيرة ماعجبتني مره يعني تصميمها قديم شوي لاكن جديده ونظيفه الفله فيها دورين مع مسبح وماتطل على البحر ماصورتها للأسف يمكن عشانها مااعجبتني مره بس تمشي الحال أحسن من الناس اللي نايمين عند البحر   هذي صور أول مادخلنا ينبع فيه مجسمات حلوه بس ماأمداني أصورها للأسف   أحنا وصلنا على أخر الظهر رحنا ندور سكن وبعدين لقينا اللي تو قلتلكم عنها بس قالنا أرجعو بعد المغرب  رحنا ندور لنا مطعم مالقينا شي حسنا حسنا وما فيه بالأخير مرينا أقرب مطبخ وخذنا دجاج مع رز((حالتنا صعبه   رحنا عن البحر وتغدينا مدري تعشينا لانه كان بعد صلاة المغرب  اليوم الثاني رحنا البحر نفطر الجو كان يجنننن مغيم وفيه رشات مطر    أفطرنا فطور خفيف وبعدين قمنا للبحر الأمواج كانت قويه لحد ما يعني أنواع المتعه وانا طابين في البحر أنواع الشعور الجميل كنا مقررين نروح للغواصه اللي بالهيئة الملكيه بس صار مافيها حجز المهم قررنا نروح واحده ثانيه عند مرسى الأحلام بس مو غواصه غواصه يعني قارب والدور اللي تحت فيه قزاز تشوف الأعماق((على فكره الغواضه هي سبب الرحله بالنسبة لي   كلمناهم قالو تعالو بكره الساعه سبعه عشان الجو كان فيه هوا قوي   رحنا للهيئة الملكية وهناك لقينا المطاعم والناس وفيه مجمع الدانه دخلناه بس كان وقت صلاة مقفل وانا جايعين نبي غداء طلعنا ورحنا لحبيب الجماهير البيك تغدينا وكانت الخطه اننا نروح البحر بس للأسف الجو كان يطير مايساعد أبد هوا قوي بس وقفنا عند الكرنييش عشان عزوز يبي يركب دباب كان فيه عربات ركبنا فيها انا وامي واخواتي ابوي يتفرج عليها بس خخخخخ وانا على العربه أصور عزيز متحمس من أول مادخلنا ينبع وهو مقلقنا أبي دباب أبي دباب أخر يوم لنا في ينبع رحنا للغواصه المنتظره الجو كان جميل بعد لاكن الهوا مو قوي هادي هذا المرسى أسمه مرسى الأحلام مره رايق هذي جلسات تبع المرسى للانتظار السمك قريب مره منك يجنن شكله ركبنا بسم الله القارب متوسط الحجم قعدنا فوق لانه مانقدر نشوف شي الا لما يوقف فوق الحي المرجاني صور للبحر الخوقاق شكل البحر هنا خورافي كنه قماش حرير((مايمديكم على التشبيه تحت القارب واخيرا وقف القارب وطلع الحي المرجاني أسماك صغيره وكبيرة ونباتات غريبه وبألوان أغرب سبحان الله وبعد ماطلعنا من المرسى مشينا على طول لرياض وودعنا ينبع الجميله     أخر صورة تم التقاطها في ينبع الصناعية الرحله ممتعه بشكل عام وينبع اللي يبي يروح لها حده ثلاث أيام تكفيه لان مافيها أشياء كثير بس بحر   أتمنى أستمتعتو بقراءة التقرير     لقلوبكم