flavors.me

بسم الله الرحمن الرحيم كيف حالكم جميعا..؟ اليوم بعرفكم على خدمة جدا جميله يمكن بعضكم يعرفها والبعض جديده عليه لاكن أنا أحب أشارككم بأي شي جديد علي الخدمه هي flavors.me  تقدر من خلالها تصمم لك ملف شخصي يحوي على معلومات عنك وصفحاتك في المواقع الاجتماعيه وموقعك الشخصي الخدمة ماهي جديده وكثرة المواقع اللي تقدم هالخدمه لاكن اللي يميزها هنا أنك تقدر تضيف تحديثاتك على تويتر والفيس بوك واليوتيوب وغيرها فا اللي يزور ملفك راح يعرف جديدك في هالمواقع جدا جميل الموقع ويحمل خيارات كثيره بعضها مجاني وبعضها بفلوس واجهة الموقع أول ماتدخل الموقع أضغط على Get started لانشاء صفحه خاصه فيك  عبي هذي 1-ايميلك 2-أسمك(الأسم يظهر في الرابط) 3-كلمة المرور  تم انشاء صفحتك =) الشريط الرمادي اللي على جنب هذا للخيارت ولتعيديل الملف والاضافه عليه  أول خيار تعديل التعريف والأسم أكتب أسمك وتعريف مختصر عن نفسك  الخيار الثاني لاضافة صفحاتك للأسف عندك 5 مواقع بس واذا حاب تضيف زياده لازم تدفع فلوس  هذي خيارات لشكل الصفحه: 1-تخطيط الصفحه فيه منها مجاني وفيه مدفوع 2-خلفية الملف الشخصي 3-الألوان للعنوان والوصف وكل شي 4-الخطوط 5-مومهمه بس هي مكان الحقوق او شي تقدر ترفعه وتنزله يعني تغير مكانه 1-لاضافة تحديثاتك في اي موقع مثلا الفيس بوك 2-تقدر تغير الماوس وتحط ماوس خاص بصفحتك 3-هذا الخيار اظن يوريك الخدمات المفوعه(والله في خدمات حلوه) هذي صفحتي ^^ ان شالله الخدمة أعجبتكم والشرح يكون وافي لكل اللي مرو من هون أمسكو

خلفيتك بنكهة أصدقائك التويتريين

السلام عليكم ورحمة الله وبركاته كيف حالكم زوار مدونتي الحلوين ..؟ المفروض تدوينة اليوم تكون عن طلعة البر بس تم تغيير الموضوع لموضوع ثاني بتعرفونه الحين لاني أحس كثرة مواضيع سواليف هاليومين او بالاصح المواضيع اللي مالها فايده لازم نرضي جميع الاطراف وبعد لان الموضوع مابعد جهزته يعني صور وكذا اليوم جبت لكم حركة حلوه لمستخدمين تويتر وهي أنك تحط رمزيات متابعينك أو الناس اللي تتابعهم خلفيه لك على التويتر حركة حلوه  وشفتها عند بعض الأصدقاء على تويتر حبيت أشرح لكم طريقة عملها بسم الله أول شي تفتح على موقع twilk هنا خيارات الخلفية تبي الصور تصير صغيره او كبيره ملونه والا اسود وابيض وتقدر تحط صور اللي يتبعونك او اللي انت تتابعهم او كلهم سوا ومبروك عليك الخلفية الجديده اتمنى ان الاضافه اعجبتكم واللي ماعجبته موب لازم((خربتها لكم

موقع لتبادل اللغات italki

السلام عليكم ورحمة الله وبركاته

كل عام وأنتم بخير بعد الزحمة

هاه كيف العيد والخرفان من اللي ضحى منكم..؟ الله يتقبل من الجميع ويرد الحجاج سالمين غانمين لأهلهم

موضوع اليوم راح أتكلم فيه عن موقع جدا جمييييل للي يبون يتعلمون لغه انجليزية والا كوريه والا اي لغة في العالم هو المفروض من زمان شارحه هالدرس بس العجز مايخليني أسوي شي((أحلفي

الموقع هو عبارة عن موقع لتبادل اللغات يشبه لحد ما الفيس بوك بس يكون محور الحديث عن اللغة اللي تبي تتعلمها

أول شي خلوني أعرفكم بالموقع أسم الموقع italki

الموقع جدا سهل التعامل معه وبعد بالعربي

طريقة التسجيل بعد سهله وهذي الطريقة

1- اللغة اللي تتكلمها

2-اللغة اللي تتعلمها

3-دولتك

4-ايميلك

5-كلمة المرور

6-أسمك

بعدها روح لأيميلك وأضغط على الرابط اللي بجيك ومبروك عليك التفعيل

من مميزات الموقع:

1-البحث عن أصدقاء اللغة يعني أشخاص لديهم نفس الاهتمام باللغة

1-الصديق اللي تبحث عنه يتكلم بأي لغة

2-ويتعلم اي لغة (يفضل تحط العربيه عشان تستفيدون من بعض وتفهمون على بعض)

3-وين ساكن

4-عمره

5-بنت والا ولد(البنات مع البنات والاولاد مع الاولاد)

6-مدينته

2-استئجار معلم يعلمك

1-يعلمك اي لغة

2-يتكلم اي لغة

3-من وين

4-السعر اللي يناسبك

3-محاضرات للغة

1-اللغة

2-نوع الفصل فيه كم نوع

3-السعر المناسب (أتوقع في دروس وحاضرات مجانيه) حسب المعلم ممكن يكون كريم

4-محادثة

تقدر تسولف مع اصدقائك مثل محادثات الفيس بوك تماما واظن ان فيه محادثات بالصوت =)

6-أسأل اللي بخاطرك

اذا عنك سؤال مافهمته او شي تبي تترجمه ماعليك الا تحط سؤالك والربع موب مقصرين  

تقريبا هذي أهم مميزات الموقع

أتمنى أكون قدمت شي يفيدكم

ملاحظه:أنا عرفتكم على الموقع عشان تستفيدون منه وأنا بريئة من اللي ستخدمه لغرض ثاني((كلكم فاهمين قصدي

مودتي لكم

إيقونتك على مزاجك

السلام عليكم ورحمة وبركاته  كل عام وأنتم بخير ينعاد علينا وعليكم  بعد موضوع ايقونات تويتر حمستوني أنزل أيقونات ثانيه بس هالمرة لمواقع أجتماعية ثانيه  أتمنى تنال اعجباكم                                                                                                                                                                                                                                                                     للتحميل جميع الحقوق محفوظة وعليكم بالعافيه =)