السبت، 18 ديسمبر 2010

أطلق رحلة بر =)



السلام عليكم ورحمة الله وبركاته

كيفكم ياالحلوين..؟
ياأنه جايتني حالة عجز اوب صاحيه((متى صرتي سنعه اصلا هع
تدورينة البر هذي مابغت تطلع كله عشاني متعيجزة أفتح الفوتو واعدل الصور وكذا
عاد اخير هداني الله وعدلتهم ونزلت الموضوع

الأسبوع اللي قبل اللي فات أنا وبنات خالاتي الجميلات قلنا لخالي نبي نروح البر وأنت كلم الرجال وتفاهم معهم واتفقو اي مكان تبونه عادي((نرحم خخخخخ
المهم أتفقوا اننا نروح يوم الأربعاء وترجع الخميس عشان ولد خالتي بيجي من أمريكاء والا كان بنجلس لين الجمعه
والبر كان العماريه

اليوم الثلاثاء رحنا انا واختي وبنات خالتي لهيبر بنده نشتري بهانيس((لغير الناطقين بالنجدية يعني اشيائات توكل بس كلها خرابيط مالها فايده 

هذا أفضل قسم عندي في الماركت قسم الشبساااات




عربيتنا الجميله


عند الكاشير شفتو هالشبس اللي لونه وردي طعمه فضيييع حار مع كتشب مدري كيف طعمه خطير
الحساب كان 333 طبعا دفعناها قطه


جايوم الاربعاء اخير طبعا بما أنه في دومات ماطلعنا الا حول المغرب من البيت لما نزلت أشوف العفش والتجهيز لقيت هالعفش اللي موب صاحي اقول لأمي شكلكم بتقعدون أسبوع ماكنها ليلة وراجعين 
هذا بعض منه ولو سمحتو العقش له سيارة لحاله 



وصلنا البر لاكن كان ظلام و مابعد خلصو من خيمة الرجال والماطور استهبل علينا شوي بعدين عقل 
بعد ماضبطو الوضع وكل واحد خذ مكانه بدوا يسوون العشاء أمي سوت رز مع دجاج من الجوع لحسنا الصحن 
بعدين طلعنا احنا ياالبنات برا وشبينا ضو الجلسه كانت خوقاااااااااااااااق 

جابين معنا جميع أنواع الكوفي حمينا المويه على النار



هنا أتحف شي طبعا احنا من زود المدري وشو جايبين سيارة فيها جميع انواع الاكل والموعين والفرش اللي تخطر على بالكم ونسينا نجيب ملاعق 
المثل يقول:الحاجة أم الأختراع  أخترعنا لنا ملعقة عشان نحرك الكوفي وش رايكم في ملعقتنا


هذا كاسي مع الشوكلاته المفضلة


جلسنا في هالجلسة الجميلة وكان معنا خالي وأمي الجو كان فله لما جت الساعه 2 ونص دخلنا ننام 
البرد كان فضييييييع بالموت نمت

جا الصبح كان أبرد من الليل قوموني أصلي الفجر صليت وطلعت برا كانو خالاتي جالسين برا وشابين ضو ويحمون حنيني على النار((للمعلوميه مااحبها 
كنت مشتهيه قرص على الفحم قلت لأمي سويلي مالي دخل انا مااحب الحنيني قالت أن جدتي بتجي وبتجيبه معها((مانامت معنا من أمس ماتحب البر 
الحنيني على النار

جلست أشرب حليب مع مصاص صوفيو بالشكولاته طعمه حلو والله


واخيرا جت جدتي وحطينا الفطور


القرص


جابت معاه بعد اكلتي المفضله المفروك


بعد الفطور رحنا مع خالي نطعس الصراحه شعور لايوصف 
بعدين ودانا ندور في البر في السيارة 

هذا طعسنا البر حلو صاير بر عادي وجبال وشجر وفيه طعس على جمب



صور للمخيم 
خيمة الرقاله


خيمة الحريم والمطبخ


رجعنا للمخيم وجا خالي وعياله بداء الجو يحتر بعضنا راح ينوم وبعضهم جالسين برا أنا رحت أنوم 
وقمت من الحر الظهر كان حار من جد عكس الليل 

خالتي سوت الغداء كبسة يحبها قلبك 
سوت دجاج ولحم طبعا مافيه ملاعق فاناكل بيدينا تصدقون الأكل باليد أطعم


بعد الغداء رحنا مع خالي بس موب نفسه اللي قبل لا الكبير 
رحنا نطعس بغينا نموت والله بس الحمدلله نجينا وغرزت السيارة بس طلعت بسرعه

رجعنا المخيم بسلام بعدين راحو بنت خالي واختي لكعس عشان يتزحلقون مدري يتقلبون فيه 
ورجعت بنت خالي متسبحه في الرمل شكلها يضحك وهذي نظارتها 


قرب وقت الروحه بديت أنا واختي نجمع القراطيس من الارض عشان اذا جا احد بعدنا يلقاه نظيف وخالي قال بحرقها



وبكذا تكون خلصت رحلتنا الجميل 
والله كانت ونااااااااسة تمنيت اننا طولنا بس ان شالله نروح مره ثانيه

لكم كل أبوكم